Fréier wann de Kapitän mat senger Mannschaft mam grousse Seegelschëff fir eng grouss Rees opgebrach ass, da woussten si ni sou genau wéi laang dat géif daueren a wat si alles géifen do erliewen.

Munchmol haten si ganz vill ze schaffen, mee wa keng Loft war an hiert Seegelschëff net konnt fueren, dann hunn si sech fuerchtbar gelangweilt. Wa Matrousen näischt ze schaffen haten, dann huet de Kapitän hinnen ëmmer eng Aufgab, eng sougenannten Aktivitéit ginn, fir datt si sech net langweilen.
Aner Deeg huet hien hinnen eppes ze bauen oder ze schaffe ginn. A wann seng Matrouse mol net gutt drop waren an e bëssen d’Flemm haten, dann huet hien si mat engem flotte Sproch erëm opgemontert. De Kapitän, dee schonn iwwert all d’Mierer vun der Welt geseegelt war a ganz vill Saache wosst, huet senge Matrousen och mol ëmmer gären deen een oder aneren Tipp ginn, fir datt si gesond a monter op hirer Rees bliwwe sinn.

An all Owend huet de Kapitän ganz genau a säi Logbuch opgeschriwwen, wat si den Dag iwwer sou erlieft haten, datt hien sech fir ëmmer u seng Rees konnt erënneren.

Léif Kanner, am Moment sëtze mir och all an engem Boot. Mir kënnen net wéi soss an d’Schoul oder an d´Maison Relais, och net an de Sport oder an d´Musek a mir kënnen och eis Frënn a Famill net méi besiche goen. Déi ganzen Zäit doheem ze sinn, kann heiansdo ganz schéi langweileg ginn. An dofir hu mir, sou wéi de Kapitän fréier fir seng Matrousen, fir iech eng Rei flott Saache preparéiert.

Kommt all Dag bei eis op de Site kucken, wat mir eis fir iech ausgeduecht hunn.

Ahoi!

Léif Elteren,

den Ament si mir an enger Situatioun, wéi mir se nach ni virdru kannt hunn. Mir wëssen, datt et net ganz einfach wäert sinn, d’Kanner de ganzen Dag sënnvoll doheem ze beschäftegen. Dofir proposéiere mir Iech all Dag, vu Méindes bis Freides, hei op dësem Site Aktivitéiten, wéi Är Kanner e puer flott Momenter kënne verbréngen. Kuckt Iech einfach déi verschidde Kategorien un, déi mir fir d’Kanner virbereet hunn. Dir fannt hei d’Rubriken “AKTIVITÉITEN”, “TIPP” a “SPROCH” vum Dag a ”LOGBUCH”, déi mir de Kanner uewe virgestallt hunn. Do dernieft hu mir och nach 2 weider Rubriken: de “LINK” vum Dag, wou Dir all Dag e flotten an interessante Link kënnt entdecken mat all méiglechen Aktivitéiten an Iddien fir d’Kanner an “TUTORIALS”, wou Dir flott  Bastelaktivitéiten an Experimenter präsentéiert kritt.

Wann Dir wëllt, kënnt Dir gäre Fotoe vun Ären Aktivitéiten ënnert #KannerDoheem op Facebook oder Instagram deelen.

Mir sëtzen all an engem Boot an och wa mir am Moment kee perséinleche Kontakt kënnen hunn, sou ass et dach wichteg, net eleng ze sinn. #KannerDoheem ass eng Méiglechkeet fir matenee verbonnen ze bleiwen.

Beuecht dobäi awer wannechgelift
d’Recommandatiounen iwwert d’Verbreedung vu Biller vu BEE SECURE.
(Tipp Nummer 7)