Logbuch

Léif Kanner,

dat wat mir am Moment alles erliewen, dat ass et nach ni virdru ginn an dir wäert bestëmmt nach ganz laang mat ärer Famill an äre Frënn doriwwer schwätzen. Vläicht erzielt dir souguer herno ären eegene Kanner, wat dir 2020 alles erlieft hutt.

Dofir wär et dach elo eng flott Iddi, sou wéi de Kapitän op senger Rees um Seegelschëff, e Logbuch ze féieren an alles, wat dir sou erlieft, wat schéin ass a wat vläicht manner schéin ass, opzeschreiwen. Huelt iech einfach en Heft oder e puer Blieder an e Classeur a schreift, moolt oder pecht Saachen do dran, déi iech beschäftegen. Da kënnt dir iech herno ëmmer un dës aussergewéinlech Momenter erënneren.

Léif Elteren,

fir Iech an Är Kanner, sou wéi fir eis all, sinn dat heite ganz aussergewéinlech Zäiten.

Mir denken, et wier eng gutt Saach, wann d’Kanner hir Erliefnisser, Andréck, Gefiller a Gedanke kéinten op enger Plaz ausdrécken a festhalen. Dofir lancéiere mir dës Iddi, datt d‘Kanner e Logbuch/Tagebuch kënne féieren.

Eisen Alldag ass net méi sou wéi mir e gewinnt waren, alles ass op der Kopp. Fir eis a besonnesch fir eis Kanner, ass et wichteg, och an dësen Zäiten e gewëssene Rhythmus am Dag bäizebehalen. D’Logbuch kéint Iech dofir als flott deeglecht Ritual eng Méiglechkeet bidden, zesumme mat Ärem Kand zu enger fester Auerzäit d’Andréck an d’Erliefnisser vum Dag festzehalen.

Och hei wier et flott, wann Dir, mam Averständnis vun Äre Kanner, déi eng oder aner Foto vum Logbuch ënnert #KannerDoheem op Facebook an Instagram géift deelen an sou am Austausch mat aneren Elteren a Kanner kéint sinn.

Beuecht dobäi awer wannechgelift
d’Recommandatiounen iwwert d’Verbreedung vu Biller vu BEE SECURE.
(Nummer 7)